O Concello de Cangas organizou este ano o seu 19º certame de cartas de amor no que participaron case un centenar de persoas.

A nosa alumna de 2º ESO, Sabela Martínez Soliño, resultou gañadora do primeiro premio na categoría A cunha fermosa carta que podedes ler a continuación.

Moitos parabéns!

CARTA DE SABELA

Para  ti:

Hai  máis  dun  ano  que  non  sei  nada  de  ti, nin  sequera  sei  se  me  recordas. Se  les  isto  algún  día, quero  que  saibas  que  eu  non  te  olvidei, nin  creo  que  algún  día  poida  chegar  a  olvidarte.

Só  me  quedan  os  recordos,  eses  que  tanto  gardo  na  miña  memoria  e  no  meu  corazón  para  que  nunca  se  perdan  nin  os  esqueza. Eras  unha  persoa  moi  especial. Ti, en  tan  só  nove  meses  marcaches  unha  liña  dentro  de  min  que, aínda  hoxe, despois  de  tanto  tempo, non  se  consegue  borrar.

Desde o  día  que  te  coñecín, algo  dentro  de  min  cambiou. Comecei  a  falar  contigo  e  nunca  deixei  de  facelo. Sempre  tiñamos  algo  que  contarnos. Fomos  desas  persoas  que  se  coñeceron  por  casualidade  nun  mal  momento, pero  que  xuntas  loitaron  contra  todas  as  barreiras  e  dificultades  que  a  vida  lles  puxo  por  diante. Eramos  inseparables. Faciamos  calquera  cousa  para  poder  vernos  un  anaquiño  máis, e  iso, por  unha  estraña  e  bonita  razón, uníanos.

Fuches  das  poucas  persoas  que  me  fixo  sentir  escoitada, comprendida  e  querida  en  calquera  momento, en  calquera  lugar, en  calquera  vida…

Sen  dúbida  algunha, cando  estaba  contigo  era  a  persoa  máis  feliz  do  mundo  enteiro. E agora  que  non  estás  sinto  un  baleiro  inmenso  que, só  ti, se  volves, serás  capaz  de  enchelo  de  novo.

Non  te  esquezas  que  sempre  te  levarei  dentro  do  meu  corazón.